2014年9月26日 星期五

Day 16 討厭大城市(柬浦寨暹粒)

(Day 16) 2014-6-4
住宿:onestop hostel
行程:老撾琅勃拉邦 —> 柬浦寨暹粒


今個旅程原意係由屋企搭車去旅行,搭到落柬浦寨,不幸係炒車令到不能完成⋯ 休養期間港女係香港幫我上網book左程機票,由琅勃拉邦這裡直飛我既尾站,柬浦寨既暹粒。


因為受傷後無執拾日常用品,攪到一地都係,所以瞓醒後執左一朝野! 
係guesthouse 對面食完碗麵後,Say就車我去機場啦,先係舖頭內同相處左咁多日既職員逐一道別,然後Say請我去一間地道餐廳食飯,之後仲係市內兜左個圈tim,佢好似唔捨得我咁揸得極慢...


送機時同阿Say講只想要返幾張Grandma替我祈福既相,而平時佢係咁捉住我影D自拍照我唔要啦! 費事有咁多合照啦! 臨走時Say同我講Like me a little bit⋯ (拿!我有向港女申報架!)




2小時到達柬浦寨暹粒
出機場坐$5-USD 篤篤,去司機推介既Guesthouse $25-USD一晚,並聽取司機建議即刻去吳哥窟,佢話可買定聽日票,而持聽日票就可以係今日1600後免費進場架!



去到剛開始日落,黃昏既吳哥很美呀! 獨自遊覽時有警察主動話收$5-USD就可上塔頂,其實都幾有興趣架!不過我唔鼓勵呢D行為所以無理佢,而另一個女仔有興趣噃,但因壓價唔成最後都無上去。









及後遊覽時再遇返呢個女仔,原來來自上海,放假來柬浦寨旅行,遇正相機無電,仲叫我send吳哥美景照片比佢tim! 最後交換了facebook; 離開時極力推介我去吳哥窟外圍既大排檔飲椰青,話價錢又合理椰青又大個! 於是一齊離開吳哥窟,上海女仔租單車來的,見佢踩單車我坐車咁唔太好,所以叫埋佢上篤篤車叫車夫車我地一齊去飲椰青。


酒店停電,話正在搶修,仲拿拿臨收左我錢! 沖涼時電話既閃光燈同拍拍燈發揮作用; 沖涼後剛才既上海女仔約左我食飯,踩佢借比我既單車去佢hostel等佢,而佢仲帶埋一個剛啱入住既香港女仔一齊食。


呢個香港女仔正讀大學,說話間顯得無憂無慮,話屋企人比錢佢去黎玩,上年已去了東歐成兩個月,仲成日稱自己今年去得太多太多旅行了… 哈哈~ 真幸福,有點葡萄佢Tim! 我地平時成日鬧內地人,今次我遇到既香港人真係完全被比下去了!



食完行返住宿,感到暹粒這城市好討厭,係街上行過,基本上每架搵食車既司機都會叫你,"篤篤"、" Motorbike ",好多甚至係對面街已大聲嗌過黎! 但我當時正常慢步,好明顯唔係要車! 總之係暹粒,你係街上行就似食物一樣被千萬蒼蠅侵擾,如果唔係有吳哥窟我一定即走架!


返到酒店仍無電,發現並不是只係酒店停電,而這裡幾條街都停呀! 沖完個凍水涼瞓覺,瞓左一陣熱到成頭濕晒,窗又開唔到,又焗又熱,根本瞓唔到,係門口坐左陣又比蚊咬… 諗諗吓橫掂都諗住聽日入住上海女仔所講既hostel, 不如就依家去啦!
@1200


摸黑行出大街其間遇到當地母女,得知當地久唔久就會停電架! 仲話隨時hold night Tim! 我諗選擇離開都係明智既~


One stop hostel 4人間床位$8-USD,有冷氣,free wifi,乾淨又企理! 總之今日就黑仔啦!
@0100

13 則留言:

  1. 酒店停電, 咁熱,無冷氣, 真係好難捱.....
    我幾年係VEINICE 都試過, 酒店窗向街(感覺黑店), 好鬼嘈,無泠氣, 又焗又熱,根本瞓唔到,開窗又比蚊咬… 捱左一晚, 第二日晨早即刻找地方搬......

    回覆刪除
    回覆
    1. 威尼斯貴,但地中海氣候熱極都有個普既,所以一定捱落去,但柬浦寨住宿便宜,諗都唔使諗~

      刪除
    2. 威尼斯酒店價錢一點也不便宜. 當年都要成50EURO/晚. 無早餐, 公眾浴廁......
      搬....係因為我搵到間大學宿舍的HOSTEL. 都無冷氣, 路程離火車站約 20分鐘. 雖然地方舊DD, 算企埋. 但有廚房可煮食, 附近有超市, 宿舍環境寧靜. 今次去威尼斯, 我都係住呢間. (我上次住3 人女生宿舍, 今次住2 人宿舍. 公眾浴廁) ^^

      刪除
    3. 我話威尼斯貴架,哈哈~
      我當時住周圍都起碼80歐,好彩我最後都搵到間60歐

      刪除
  2. 通常喱D著名旅遊景點城市都係好多「烏蠅」比較煩^^
    銀仔哥看來真係幾多浪蝶堆身架喎XXXD 咁樣申報都無用啦~~~~港女有冇話以後一律唔再審批你「個人遊」XXXXD

    回覆刪除
    回覆
    1. 基仔惟恐天下不亂咩!曳!

      刪除
    2. 阿Jane都唔幫你呀⋯
      港女無講喎~

      刪除
  3. 黃昏吳哥窟好靚!打哂燈咁靚!
    內地人都有知識份子,亦都有見地,我旅行時都時時遇見,上次在海洋公園就遇到一家有禮貌的人。

    回覆刪除
    回覆
    1. 無錯,側光永遠最靚~
      但可惜十家只得一家⋯

      刪除
  4. 你都唔算黑仔吖,咁多艷遇...XDDD

    回覆刪除