2014年5月20日 星期二

搭車去旅遊

早排既新聞,飛機失事,船又沉,究竟依家係咪2014年架!咁啱撞正我呢次旅行係諗住搭車去既,不過大陸既火車站近來又成日斬人,依家連搭火車都有危險,咁唯有搭巴士了...






呢排港人去旅行又興乜?咪就係延續左一段時間既單車旅行囉!剛啱有同事先去完台灣環島!台灣環島,我比人撩去都起碼超過兩次,不過都被我一一拒絕!唔係話銀仔唔鍾意踩單車,而係極度唔鍾意跟潮流啫~ 都唔止講過一次,銀仔係十年前無乜人單車旅遊,已經係埃及有租單車踩過一日去帝王谷啦!
所以銀仔今次,就係搭巴士去旅行! 目的地係,越南、老撾,最後搭到去總站既柬浦寨! 雖然搭巴士去旅行都唔係乜野新鮮事,但都總好過好似其他人咁一窩蜂去單車遊吖! 
當然搭車去越南更加唔係乜野新鮮事啦,剛啱同一個同事傾開旅行野,原來佢又係陸路去越南喎! 只係遲我一星期出發,佢同一大班朋友包團去,廣x旅行社,每人只雖$1300-HKD全包! 包乜呢? 包$500既Visa,4晚越南酒店,當然仲有食及車資啦! 我問會唔會迫購物,其他費用?佢話已報該旅行社第三次,都無試過喎... 嘩嘩嘩!乜真係平得咁緊要架!咁賺乜呢?



以上是出發前一星期寫下的,但只是短短幾日間,情況大改變,越南方面因南海問題,排華嚴重,仲死左中國人Tim! 香港已對當地發出紅色旅遊警告! 所以呢,計劃係跟不上變化!正正好在我係唔鍾意plan,只買了回程機票,如果一早book好晒越南既住宿就真係有排煩了... 依家正密切注意當地狀況,不過應該唔會去了... 但如果經越南入老撾就真係快好多,因為係深圳有一程車就去到越南邊境;依家唔去越南就要兜到去雲南入老撾了,如睇地圖就知幾遠了,算啦,順道去埋元陽梯田同西湘版納啦~ 有人叫我咁樣不如買程機票去雲南既昆明啦! 但識左銀仔有一段時間既朋友都知,我有時對旅行真係好鬼執著架! 既然決定搭車去旅行,我一定堅持架~ 如真係唔入越南,就浪費左$500既簽證費了...

有時發覺我真係好鬼懶,出發前一個星期先去深圳書城買本老撾旅遊書,同事都問「依家先買!」這同事識得我日子尚淺,哈哈~ 買左返黎都出發呢刻都無認真睇過! 而點樣去雲南亦從未搵過資料,只睇過Google map 咋! 銀仔深信,有路就絕對去到既~ 而旅途期間尋找方法去一個目的地,我都覺得係一種樂趣,係旅途上既經歷之一~ 

Gogogo 掉低港女,獨自流浪去~

21 則留言:

  1. 羡慕。 仲要羡慕你有個可以掉低唔咋型嘅港女。^o^

    回覆刪除
  2. 我都覺得唔駛plan得太仔細,才會有意外驚喜!
    祝一路順風影多啲寮國秘境靚相來看^^

    回覆刪除
    回覆
    1. 好! 我主要玩北部,對香港人黎講係秘境,鬼鬼一早去到爛晒了⋯

      刪除
  3. 搭車喎!一路順風啦!
    我都冇祥細計劃o架!旅行可以因天氣或事故而改變行程嘅!

    回覆刪除
  4. 乜解究港女會對你咁好架,如果我個C6掉低我自己去旅行,我一定換咗屋企度門鎖!

    回覆刪除
    回覆
    1. 係佢識我時已知我係咁既人,無辦法,哈哈~

      刪除
  5. 東南亞政局不穩, 注意當地狀況, 一路順風平安!

    回覆刪除
  6. 無固定目標的旅遊,實在無需太多計劃,不過如果去的不是「大路」國家,我還是會先瞭解一下當地治安、習俗、過關問題等等。經常見到一些矇查查的背包客(尤其美國人),在旅途上遇上問題陣腳大亂,全因自己沒有做好功課,難道他們真的那麼瀟灑不介意這些麻煩嗎?才不!

    另外,港女放你一個人流浪,是非常明智之舉,既然她給你信任,你當然會更加珍惜她,讓她知道她沒有信錯你,對吧?

    回覆刪除
    回覆
    1. hehe~ 我就係你講既"矇查查的背包客"囉~
      唔到佢唔放,因為佢識我時已講到明,哈哈~

      刪除
  7. 正~到時又可以參考下你的資料,Laos(和Burma)都係喺我嘅travel list上。其實我同蟲老公都會各自各去旅行,冇問題喎。不過近排真係七國咁亂,路上小心!

    回覆刪除
    回覆
    1. 我去Laos時間雖長,但去既地方較少,希望幫到你~ 我去時周邊真係亂個亂世佳人呀!

      刪除
  8. 去就最緊要扮唔識講中文, 惡補幾句越南話先啦, 好似"北漏洞拉, 入緊肥忽."

    回覆刪除
    回覆
    1. 我話Japanese囉! 哈哈~ 北漏洞拉我細個係收音機成日都聽到架~

      刪除
  9. 回覆
    1. sorry,懶啫!又世界杯又返工<−− 搵藉口,哈哈~

      刪除
  10. I loved as much as you'll receive carried out right here.

    The sketch is attractive, your authored subject matter stylish.
    nonetheless, you command get got an shakiness over that you wish be delivering the following.
    unwell unquestionably come more formerly again since exactly
    the same nearly a lot often inside case you shield this
    hike.

    my web blog :: Arno Wingen

    回覆刪除